देशातील दोन राज्ये आणि एका केंद्रशासित प्रदेशात आज विधानसभा निवडणुकीसाठी मतदानाचा उत्साह शिगेला पोहोचला आहे. आसाम, केरळ आणि पाँडिचेरीमध्ये आज एकाच टप्प्यात मतदान प्रक्रिया पार पडत आहे. दुपारी १ वाजेपर्यंतच्या आकडेवारीनुसार, आसाममध्ये मतदारांनी सर्वाधिक उत्साह दाखवला असून तिथे मतदानाचा टक्का ६० टक्क्यांच्या उंबरठ्यावर पोहोचला आहे.
मतदानाची टक्केवारी (दुपारी १ वाजेपर्यंत):
आसाम (१२६ जागा): ५९.६३%
पाँडिचेरी (३० जागा): ५६.८३%
केरळ (१४० जागा): ४९.७०%
आसाममध्ये १२६, केरळमध्ये १४० आणि पाँडिचेरीमध्ये ३० विधानसभा जागांसाठी जनता आपला कौल ईव्हीएममध्ये बंद करत आहे.
आसाममध्ये कर्तव्यावर असलेल्या मतदान अधिकाऱ्याचा मृत्यू
निवडणूक प्रक्रियेदरम्यान आसामच्या सोनितपूर जिल्ह्यातून एक दुर्दैवी घटना समोर आली आहे. नदुआ मतदारसंघातील मतदान केंद्र क्रमांक २३० वर तैनात असलेले ४५ वर्षीय मतदान अधिकारी देबेन होरो यांचा मृत्यू झाला. ते सकाळी आपल्या बिछान्यावर बेशुद्धावस्थेत आढळले होते. रुग्णालयात नेले असता डॉक्टरांनी त्यांना मृत घोषित केले. होरो हे चारीद्वार भागातील एका सरकारी शाळेत सहायक शिक्षक होते. प्रशासनाने तातडीने त्यांच्या जागी आरक्षित कर्मचाऱ्याची नियुक्ती केल्याने मतदानावर कोणताही परिणाम झाला नाही.
आसाममध्ये सायंकाळी ५ वाजेपर्यंत मतदान सुरू राहणार असून, या सर्व राज्यांचा निकाल ४ मे २०२६ रोजी जाहीर होणार आहे.
